ANINAWIN ANG KAUNLARAN

​

Patuloy ang lakad ng pilay na pagong

kahit sa likuran ay may nakapatong ,

ang bigat na dala'y tila naghahamon

sa mga tiisin upang makaahon.

​

Kung sa paglalakbay magiging magaan

at ang tatahakin ay tunay ang hadlang

baka makarating sa patutunguhan

bago pa lumubog ang sikat ng araw.

​

Kahit na nga hapo patuloy ang galaw

mata'y nakatuon sa bandang unahan

buhay ang pangarap kahit humihingal

kahit hinihila ng maraming kamay.

​

Ganyan ang pag-unlad ng mahal kong bayan

lupain ng henyo't bayaning matapang

tila sa kuro ko'y panaginip lamang 

ang ating pag-usad sa kasaganaan.

​

Habang ang halakhak ay nangingibabaw

ang impit na daing ay napipipilan

doon sa tambakan kasundo ay langaw

tanawing tahimik habang nangangalkal.

​

Mga tagong yaman kaya lang lumabas

ay ipanlalangis sa mga mahirap

sa kaniyang boto ay ipantatawad

sa ulcer ng tiyan ay ipanlalanggas.

​

Ang yamang natinggal lalong kumakapal

habang dinudukot ang pilak ni Huan;

batas na binuo sadyang binutasan

upang magpatuloy ang "ang bakang gatasan."

​

Sa istatistika'y kagilagilalas

ay itinuturo'y panay paitaas

kay gandang basahin, pakingga'y masarap

dahil daw pasulong ang ating pag-unlad.

​

Kung nararamdaman ang kaginhawahan

bakit humuhugos ang maraming bilang

ng mga obrero't mga propesyunal

na sa ibang bansa sila'y manilbihan?

​

Sahod na mababa, kontratang pinutol

ang ganyang kundisyo'y parang pusang gutom

ngiyaw ka nang ngiyaw tila sinusumpong 

sa dayuhang amo, laging naglalampong.

​

Hanggang ang sistema't maging disiplina

ay minaskarahan ng ibang kultura

ang kasaganaa'y mahirap makita

kung mga hunyango'y laging magpipista.

​

​

01/16/15 edv

​

​

​

Mga katha ni Efren Valte na matatagpuan sa Sali Ka, Kabayan

• ▪ TULA
• ▪ Aninawin ang Kaunlaran
• ▪ Talino: Ipinagbibili

​

​

​

Sulatan po kami kung mayroon kayong komento o puna tungkol sa kathang ito.