AMPALAYA MATAMIS!!!

​

Lipos ng pangamba ang sa dibdib ko'y bumulaga

Sa pagyapak ng aking paa dito sa lupaing banyaga

Pag-asang guminhawa ang tanging baong kalasag

sa maalwang buhay na sa pamilya ay aking nais ihatag

​

Sinuong na pangarap hindi kapagdaka'y nakamit

inaaral na dayuhang wika, ulo na'y sumasakit

Kakaibang kultura at ugaling kailangang pakisamahan

Bukod pa sa trabahong dulot ay lupaypay na katawan

​

Dangan nga lamang sa hirap pamilya'y gustong maihango

disin sana'y di aabuting magtiis at dumayo

Tigib ng pasakit ang malayo sa mahal sa buhay

Mga larawan ninyo'y tangan sa gabi'y tanging kaagapay

​

Sa paglipas ng taon mga mithii'y unti-unting nakakamit

mga anak ay nagaaral, may masasarap na pagkai't magarang damit

datapwat payak lamang, maliit kung sa karamiha'y ihahambing

subalit aking pundar na bahay, kayamanan ng maituturing

​

Kagyat na panahon na lamang ang aking susuungin

sa aking paguwi, maginhawang buhay na ang dadamhin

Biyayang bigay ng maykapal aking lalong palalawigin

sukling marapat lamang, pagpupugay sa Amang maawain

​

Sa aking diwa ngayon ay aking minumuni-muni

mga salamisim ng buhay isasalaysay sa napipintong paguwi

dala-dala'y mga kwento ng lungkot, hirap at saya

na aking naranasan dito sa lupa ng matamis na ampalaya

​

​

Agosto 7, 2007

​

​

​

Mga katha ni Zack na matatagpuan sa Sali Ka, Kabayan

• ▪ TULA
• ▪ Ampalaya Matamis!!!
• ▪ Dapit-Hapon