PAKIKIHALO NG MATANDA SA SK

 

 

TANONG:   DAPAT ba o HINDI DAPAT na makisangkot ang matatanda sa eleksyon ng Sangguniang Kabataan o SK?

 

 

Mula sa panulat ni:

Rafael A. Pulmano

 

Mga kabataang nagsiganap:

Michael Francis Garote — Dapat

Cindy Dizon — Hindi Dapat

Romeo "RJ" Reyes — Lakandiwa

 

 

LAKANDIWA

 

Sa lahat ng nariritong kabataang bagong sibol

At sa lumang kabataan ng panahong kopong-kopong

Taus-pusong pagpupugay ang una kong pahimaton

Pagpalain nawa kayo ng dakilang Panginoon.

 

Ako po si ROMEO REYES, mas kilala bilang RJ

Ang tatay ko'y si Romeo, ang nanay ko'y si Maribel

Ako po ay never been kissed, never been touched at sweet sixteen

Underweight po at malnourished dahil wala nang makain.

 

Isang munting balagtasan itong aming itatanghal

Ako po ang Lakandiwa, at heto ang katanungan:

Sa halalang pambaranggay nitong mga kabataan,

Marapat ba o di dapat matatanda'y makialam?

 

Sa sino mang nakikinig, mapabata o matanda,

Kung mayroong tatamaan, hindi namin sinasadya.

Sa palitan ng matalas at maanghang na salita,

Pulutin ang mabubuti, iwaksi ang masasama.

 

Matapos na maihayag ang babalang niloloob

Tawagin na agad natin ang makatang mag-aamok

MICHAEL FRANCIS GAROTE po, pogi pag nakatalikod

Salubungin agad natin ng palakpak na matunog!

 

 

DAPAT

 

Dapat nga ba o di dapat manghimasok ang matanda

Sa halalang pambarangay na kalahok, pawang bata?

Sagot ko po, DAPAT lamang, sapagka’t sa murang diwa

Diwang hinog ang aakay, gagabay at kakalinga.

 

Michael Francis Garote po para sa panig ng DAPAT

Apo ni Juan Caraca po, kay Abner at Nateng anak

Kapitana Maria Village, abang lingkod ay nagbuhat

Malugod na bumabati sa inyo pong lahat-lahat.

 

 

LAKANDIWA

 

Ngayong inyong kilala na ang makatang naghahamon

Katunggali naman niya ang tawagin natin ngayon:

Ang maganda't walang iba kundi si Miss CINDY DIZON

Salubungin din po natin ng palakpak na maugong!

 

 

HINDI DAPAT

 

Kabataa'y may sariling puso, isip, at pangarap

May malinis na hangarin sa kapwa at komunidad

Sa pagpili ng uupong SK chairman at kagawad,

Hindi dapat makialam, matatandang makukunat.

 

CINDY DIZON, taga-Pulo, labing-anim po ang edad

Ang erpat ko'y si Israel, si Maria ang aking ermat

Magtatanggol ngayong gabi sa panig na HINDI DAPAT

Sa inyo po'y bumabati... Mabuhay po kayong lahat.

 

 

LAKANDIWA

 

Yamang ating napagtanto ang panig na ilalaban

Ng dalawang magagaling sa pingkian ng katwiran

Simulan na agad natin ang mainit na bakbakan

Si Michael Francis ang una, palakpakan natin, Bayan.

 

 

DAPAT

 

Malaki ang respeto ko sa kaya at abilidad

Ng kapwa ko kabataang sa eleksyon ay sasabak

Ngunit kahit anong galing at husay ng murang utak

Mas mainam pa rin yaong may matandang lumilingap.

 

Ang eleksyon, ang wika nga, ay marumi, kaya naman

Kung mahina ang sikmura, dito'y hindi nababagay

Kabataang matalino ngunit walang kasanayan

Sa gulo ng pulitika'y dapat lamang alalayan.

 

Kabataan ay hindi ko minemenos, minamal'it

May sarili silang utak, ngunit bubot pa ang isip

May sarili silang puso, ngunit ampaw pa ang dibdib

May sariling simulain, ngunit hilaw pa ang matwid.

 

Subalit sa taglay nilang sigasig at kalakasan

Malaki ang magagawang serbisyo sa pamayanan

Lalo na kung tutulungan, aakayin, gagabayan

Ng matandang mas may alam at hinog sa karanasan.

 

Sa alin mang paligsahan at larangan na pambata

Mahalaga iyang papel ng may edad at matanda

Kung sa boksing ay may trainor, sa basketball ay may coach nga,

Sa halalan, kaylangan din ang matandang mas bihasa.

 

 

LAKANDIWA

 

Na aniya'y di raw dapat matatanda'y makiloko

Sa halalang kabataan – palakpakan din po ninyo!

 

 

HINDI DAPAT

 

Kalaban ko'y parang isda, sa bibig mo mahuhuli

Hindi raw sya nangmemenos, ngunit labis kung mang-api

Ang tumpak lang sa sabi nya, eleksyon nga ay marumi

At matanda, hindi bata, ang syang aking sinisisi.

 

Palistahan pa lamang daw, edad kinse-disisyete,

Diumano'y nagpista na sa pagkain ang botante

Sertipiko ng pagsilang, may lumikom, at ang siste

Pagsapit sa registration, iba raw ang dumiskarte.

 

Paniwala ko po'y hindi gagawin ng kabataan

Ang ganito kung wala pong matatandang nakialam

Marami sa matatanda'y pulitikong tradisyunal

Gumagastos, bumabayad, makamit lang ang tagumpay.

 

Tayo naman ay mayroong Sangguniang Pambarangay

Matatanda'y dito dapat makilahok, makialam

Sangguniang Kabataan, paubaya na po lamang

Sa mas batang pamunuang pag-asa ng ating bayan.

 

Kabataa'y may malinis na pangarap at prinsipyo

May matayog na hangarin at dakilang idyalismo

Kaya nilang magdisisyon sa sarili nilang mundo

Huwag na nating turuan pang matulad sa mga trapo!

 

 

LAKANDIWA

 

Ang makatang paraluman ay sandaling aawatin

Sapagka’t ang kalaban nya, kanina pa nagpipigil

At haba pong nagpipigil, lalo namang nanggigigil

Si Michael po'y nagbabalik, palakpakan muli natin!

 

 

DAPAT

 

Ano kaya'ng mangyayari sa tahanan kung ang ama

O ang ina'y walang paki habang supling ay bata pa?

Sa lupit ng bagyo't unos, basang sisiw ang kapara

Ganyan din ang kabataang sasabak sa pulitika.

 

Hindi sapat ang hangarin, prinsipyo at idyalismo

Sa larangang pulitikal kung dunong ay di pa husto

Pangulo nga nitong bansa, nakikinig sa eksperto

Musmos pa ba ang tatanggi sa payo ng beterano?

 

Sa hagdanan ay papanhik pa lamang ang kabataan

Matanda'y papanaog na – yan ay lumang kasabihan

Hindi dapat iwawaglit ang minanang gintong aral

Pakialam ng matanda'y dapat laging bigyang-galang.

 

Halalan ay hindi birong pinapasok na lang basta

Kailangan, marami kang kakilala, saka pera

Kailangan, may koneksyon sa Comelec, etcetera,

Kailangan, may matandang nagmamando, nagdidikta.

 

 

LAKANDIWA

 

Bawa’t titik, nagbabaga, tumatagos na maigi

Paralumang katunggali, ano kayang igaganti?

Palakpakan nating muli ang ma-beauty, si Miss Cindy!

 

 

HINDI DAPAT

 

Bawa’t tao'y may panahong itinakda ang Maykapal

Ang sa gurang, lumipas na, bagets naman ang pagbigyan

Masiyahan na lang sana't makuntento sa nagdaan

Ang matandang kumain na'y tila walang kabundatan.

 

Nananaog ang matanda sa hagdan ng takipsilim

Bumubukang-liwayway na, kabataa'y papanhikin

Kailan pa matututong magsikap ang mga supling

Kung palaging susubuan ng magulang sa pagkain?

 

Ang magpayo at magturo kaninuman, di masama

Subalit ang makialam ay labis na't hindi tama

Ilang pusong nag-ibigan nang dalisay at dakila

Ang nawasak dahil merong nanghimasok na matanda?

 

Matatanda, lumipas na ang panahong kasikatan

Dinaanan na po ninyo ang masayang nakaraan

Kaming mga kabataan naman ngayon ang pagbigyan

Sa eleksyon, wag na kayong makialam, alis na dyan!

 

 

LAKANDIWA

 

Lumalaon, umiigting ang bakbakan ng dalawa

Sa wari ko'y walang balak padaig sa isa't isa

Hahayaan ko na silang magkabasagan ng pula

Ang matira ay matibay - palakpakan natin sila!

 

 

DAPAT

 

Kalaban ko'y ipokrita at mahusay magkunwari

Hinahamak ang matandang sa kanya ay kumandili

Di sa ganyang katangian nabantog ang ating lahi

Isang lahing mapagmahal, may paggalang at may budhi.

 

Mga Intsik ay mayroong mahalagang kawikaan

Na angkop sa ating paksang dito ngayo'y hinihimay:

Kung ibig daw na mabatid and landas na pupuntahan

Ay tanungin silang doon ay galing na at nagdaan.

 

 

HINDI DAPAT

 

Kalaban ko'y lumilihis sa tunay na pinapaksa

Nitong aming pagtatalong sa direksyon nawawala

Ang pagtulong at patnubay ng matanda'y di masama

Subalit ang MAKIALAM, MANGHIMASOK, hindi tama.

 

Sa simula't mula pa lang, sa hardin ng paraiso

Maayos ang lahat bago nakialam ang demonyo

Hanggang ngayon, kadalasang ugat ng away at gulo

Kapag merong nanghimasok na tsismoso't usisero.

 

 

DAPAT

 

Kabataa'y mapupusok, matatanda'y mahinahon

Una'y hilaw samantalang huli'y taga sa panahon

Hahayaan baga natin na magkalat sa eleksyon

Silang bata kung matanda'y handa naman sa pagtulong?

 

 

HINDI DAPAT

 

Eh ano kung kabataan ay magkalat sa halalan?

Doon sila matututo sa kanilang kapalpakan

Bawa’t mali ay may leks’yon, bawa’t sala ay may aral

Sila rin ay magtatanda sa sariling karanasan.

 

 

DAPAT

 

Di raw dapat muli't muling imbentuhin iyang gulong

Kabataa'y di kaylangang mag-aksaya ng panahon

Magastos ang magkamali, libre naman ang magtanong

Sa matandang nagkukusa ng suporta at pagtulong.

 

 

HINDI DAPAT

 

Marami sa matatanda nu'ng mas bata pa't may lakas

Ay talunan, sawi, bigo, sa ambisyong pinangarap

Ngayon ibig magmagaling, magmarunong, magpasiklab

Manahimik na lang sana't itago ang pagkapalpak!

 

 

DAPAT

 

Kaylangan ng kabataan ang patnubay ng matanda

Upang kamtin ang tagumpay at panalong ninanasa!

 

 

HINDI DAPAT

 

Kakamtan ang ninanais sa tulong ng pandaraya

Kapag merong nanghimasok at nag-udyok na matanda!

 

 

DAPAT

 

Di lahat ng matatanda ay madaya't mapanlamang!

 

 

HINDI DAPAT

 

Di lahat ng kabataan ay bobo at walang alam!

 

 

DAPAT

 

Matatanda ay kaylangan!

 

 

HINDI DAPAT

 

Wag na silang makialam!

 

 

LAKANDIWA

 

Magsitigil muna kayo't palamigin iyang tuktok

Pahupain ang damdamin, payapain iyang loob

Kayo namang kanina pa nakangangang nanonood

Paulanan ng palakpak ang dalawang nagpanalpok.

 

Sa halalang pambaranggay nitong mga kabataan,

Marapat ba o di dapat matatanda'y makialam?

Ani Cindy, HINDI DAPAT, ani Michael ay DAPAT daw

Sino nga ba sa kanila ang may higit na katwiran?

 

Ani ni Michael, kabataan, kahit pa raw matalino

At maski na may marubdob na hangarin at prinsipyo

Pulpol pa ang kaalaman, karanasan di pa husto

Kaya anya, matatanda'y dapat lamang makihalo.

 

Ang kay Cindy, panahon daw ng matanda'y lumipas na

Kabataan naman ngayon ang hayaang pumustura

Anya'y kaya ng mas bata ang kumilos at magpasya

Di raw dapat manghimasok ang makunat at gurang na.

 

Kayo na po ang maghusga, basta po ang aming dasal

Maidaos ang eleksyon nang malinis, patas, pantay

At ang tanging kahilingan bago kami magpaalam

Pangkat namin, iboto nyo sa darating na halalan!