TALINO: IPINAGBIBILI

Ang kalakal ay panindang nabibili

sa bagsakan, sa palengke, sa groseri;

ang mga kalidad kapag napupuri

laging pinipili ng nakararami.

Ganyan din ang dunong kapag nanaisin

ipangibang bayan upang doon bilhin

antas ng talino sa iba gamitin 

upang makilala ang tunay na galing.

Manunuklas ka bang may init sa dibdib

na nang mapanghal ka'y bigla kang nanlamig

sa pulang pantapal napipi ang bibig

kaya lumupasay sa pananahimik.

Mahal mo ang bayan kahit ang sarili

ay bakit tinikis at tila inapi

ang bunga ng isip na nais isilbi

ay pinagdudaha't isinaisang tabi.

Masisisi mo ba bayang nagmaramot

kung ang aking dunong sa iba gumamot,

sasabihin mo bang taksil na lumimot

kung ang kasanaya'y sa iba ihandog?

Kapag nga nasaid ang utak sa bansa 

matatanyag tayo na bansang kawawa;

tanging maghahari'y mag-uutak biya

hanggang sa malugmok at mapanganyaya.

At kung mangyari ngang ang hibla'y humina 

mamumuhay tayo sa pagdaralita

habang ang dunong kong niluwas sa bansa

siyang nagpayaman at nagpasagana.

01/16/15 edv

Mga katha ni Efren Valte na matatagpuan sa Sali Ka, Kabayan

• ▪ TULA
• ▪ Aninawin ang Kaunlaran
• ▪ Talino: Ipinagbibili