MAY PANININDIGANG DI MAAAPULA

ni Bheng Arellano

Tala kang sumipot

Sa binging karimlan at bulag na hardin;

Subali’t dinig ka ng lunong panimdim

At nakikita ka ng kiming paningin;

May taynga ang dahong sariwa’t magaling

At may sampaguitang ang mata’y may ningning;

Pag-ibig kang handog.

Ang iyong pangako

Ay isinusulat sa pahat na diwa,

Pagka’t ang mithi mo ay malabathala;

Ibig kong ilangkap sa pagkamakata

Ang nota ng iyong dalisay na nasa

At paninindigang di maaapula;

Lunas ka ng puso.

Dila mo’y may apoy

Na ibig sumila sa kuhila’t linsil;

Ang katarungan mo ay ipatitikim

Sa mga pilato at hudas na taksil;

Di mo papayagang muli pang sikilin

Ang nagbangong dangal ng aping salamin;

May tapang ka, Noynoy.

At ang hangad mo pa

Na lalong dakilang hindi magwawakas,

Bayan ay ibangong tungo sa pag-unlad;

Buhol ng dalitang  di makalas-kalas

Sa wagas mong pita’y ikaw ang kakalag;

O, Pangulong Noynoy, pasan ma’y mabigat,

Di ka nag-iisa!!!

TUNGHAYAN DIN:

Kaugnay na Tulang Handog kay Noynoy Aquino

Sa Bagong Pangulo ni Rafael A. Pulmano

Asin at Ilaw ni Bert Cabual