HANGGANG EDSA NA LANG

ni Rafael A. Pulmano

Mula sa probinsya, lumuwas, nag-apply,

Pumila, umasa, naghintay, nagdasal

Nakuha sa tyaga, nadala sa lagay

Sa wakas! Natuloy mag-abroad si Juan.

At napabilang sya sa napakarami

Na ang tawag "kuno" ay Bagong Bayani

Bayaning sa airport pa lang ng host country      

Suspect na ang turing; ang hinala: guilty.

IMMIGRATION: Baka passport, visa - peke!

CUSTOMS: Baka merong shabu sa bagahe!

Mabusising tanong, inspeksyong maigi

Eh kasi, eh kasi - Pilipino kasi!

Tiwala ng mundo'y maramot sa atin

Kelan tayo tunay na rerespetuhin?

Sa Edsa lang yata tayo magagaling...

ARAY KO! Oh Lahing Kayumanggi, Gising!