Hiram

Mula sa panulat ni

HANA BLUE 23

HIRAM

Pag-ibig na sakdal tamis, sa akin ay inihain

Ano't ako'y bantulot sa pag-ayon sa iyong nais

Sa wari ko'y kasalanan, walang kahihinatnan

Kapwa masasaktan, puso'y masusugatan.

Pagdaka'y ano itong namamahay sa aking dibdib

Tila ako'y umiibig, puso'y di mapigilan

Araw-gabi tanging ikaw ang nasa sa isip

Mata ko'y saan man dumako, larawan mo ang nakikita.

Gabi-gabi sa higaan ang mahal ko'y hinahanap

Ngunit hindi masumpungan, kahit na sa pangarap

Ang lansangan sa paligid ay aking ginalugad

Ngunit hindi masumpungan ang sinta kong nililiyag.

Panahong nagdaa'y puspos ng pag-ibig

Pag-aalala sa isa't isa'y nasasambit

Kapag kausap ka'y langit ang kapara

Ano't ito'y di alintana, hiram na sandali

Saan man pumaruon, pag-ibig mo’y dadalhin

Gaano man kalayo ang aking marating

Iingatan sa puso ko hanggang sa mahimlay

Pag-ibig na HIRAM dadalhin hanggang libing.

Katha ni Hana Blue 23 na matatagpuan sa Sali Ka, Kabayan

Mula sa liham na padala ni miss hana_blue23:

Kumusta po kayo!

Ang tula ko pong ito'y inaalay ko sa nag-iisang taong tangi kong minahal, subali't dumating siya sa maling panahon, kaya ang titulo nito ay" HIRAM".

TUNGKOL

SA SAYT NA ITO

Mga tula at iba pang kathang handog sa OFWs: Bayani at biktima sa sariling bansa at sa ibayong dagat.