Damdamin

Mula sa panulat ni

DAMDAMIN

Sa tuwing dapithapon, doon sa dalampasigan

na aking pinagmamasdan ang lawak ng karagatan

aking naaalala ang araw na nagdaan

nang ikaw ay makilala, parang kailan lang...

Dapithapon din noon nang makilala kita

ang pakiramdam ko, puso'y tigib ng sigla

sa bawat sandali ay napapangarap ka

at naging inspirasyon ko sa paglikha ng tula.

Datapwat ang damdamin ko ay hindi maipadama

dahil sa puso ko'y nananaig ang pangamba

paano ko sasabihing iniibig kita

gayong ang puso ko ay di na malaya, o sinta?

Ang damdaming ito'y pilit kong iwawaksi

kahit na sa kalungkutan ako ay sakbibi

ang tulang ito ang siyang nagsilbing saksi

na minamahal kita, ngunit ako'y naging pipi.

Ngayong nalalapit na ang paglisan mo dito sa Saipan

sa dibdib ko'y kalungkutan ang iyong maiiwan

sa lahat ng sandali ay iisipin ko na lang

na naging inspirasyon ka kahit hindi mo alam.

Kaya nga sa dalampasigan tuwing magtatakipsilim

ang alaala mo ay nasa puso ko pa rin

gayon pa man, aking sinta, ako'y dumadalangin

sana'y mapawi na itong mali kong damdamin.

February 25, 1992

Katha ni Domingo Tolentino na matatagpuan sa Sali Ka, Kabayan

TUNGKOL

SA SAYT NA ITO

Mga tula at iba pang kathang handog sa OFWs: Bayani at biktima sa sariling bansa at sa ibayong dagat.