PANGUNGULILA

Talagang wala na yatang kasimpait

Ang maging ulila dito sa daigdig

Ang lahat ng hirap aming tinitiis

Nagtutulung-tulong kahit anong sakit.

May ilang taon na ang nakakaraan

Buhat nang si Ama sa ami’y pumanaw

Sa iisang bubong  ng kubu-kubuhan

Doon nakaranas ng kasiphayuan.

Ang tanging naiwan sa amin ni Ama

Ay kapirasong lupang kanyang sinasaka

At ang gumagawa ay wala ng iba

Kundi ang aming mabait na Ina.

Mayruon pang isang loteng naiwanan

Na tinataniman ng mga halaman

Mga punongkahoy saka mga gulay

Tanging iyon lamang ang ikinabubuhay.

Talagang ang Diyos ay makapangyarihan

Sapagka’t kami ay Kaniyang binigyan

Ng isang Inang lubhang mapagmahal

At sa kasipaga’y talagang uliran.

Sa pagtitiyaga, kami’y nag-aaral

Kahit na sabihing huli-huli lamang

Sapagka’t talagang ‘di makakayanan

Kung kami ay laging magsasabay-sabay.

Matanda sa lahat ay parmasyotika

Saka ang sumunod ay nagdu-duktora

Guro ang pakay ko at nag-aaral pa

At batang lalake na ampon ni Ina.

Mahal naming Ama, kung ikaw ay buhay

May kasama sana si Ina sa bahay

Lalo na kung kami’y nasa paaralan

Tanging siya lamang ang naiiwanan.

Mahal naming Ama, kung ikaw ay buhay

Katulong ka sana sa pagpapa-aral

‘Di sana kung gayo’y kami’y sabay-sabay

Sayang din ang mga taong nakaraan.

Mahal naming Ama, kung ikaw ay buhay

Maligaya sana yaring pamumuhay

Bagaman at kami’y nagsisipag-aral

Ay di naman lubos ang kaligayahan.

Ikaw aming Ama ang siyang dahilan

Kung bakit kami ay ‘di masiyahan

Sa kabila ng aming naging kalagayan

Kung maaari lamang kami ay balikan.  

Laura G. Balatbat  

Agosto, 1964

 

Mga katha ni Laura Balatbat-Corpuz na matatagpuan sa 

Sali Ka, Kabayan

• ▪ TULA
• ▪ Ang Tubig
• ▪ Araw ng mga Ama
• ▪ Araw ng mga Ina
• ▪ Dahilan…Tinapay
• ▪ Munting Rosaryo
• ▪ Ugaling Pilipino
• ▪ Pangungulila