DAPIT-HAPON

Hindi ko na matandaan kung kailan Kita huling kinausap

Marahil ay nalunod na ako sa mga biyayang nalasap

Sa aking tinatamasa na malayo sa dating dinanas na hirap

nawalan ako ng oras at walang ginawa kundi magpakasarap

Sinabi Mo sa akin noon na magtiwala ako sa Iyo

pangakong bubuhatin sa panahon ng siphayo

binigyan Mo ako ng pagkakataon upang makatayo

ngayon ay puro ginhawa ang aking natatamo

Kailan nga ba Kita huling napasalamatan

sa tagal ng panahon ay di ko na matandaan

samantalang dati Ikaw lamang ang sumbungan

lahat ng saloobin Ikaw ang tanging hingahan

Wala Kang hiningi sa aking kapalit ni isa

sa lahat ng tulong na Iyong ipinasa

subalit ano itong aking mga nagawa

aking ganti'y walang patumanggang pagpapabaya

Ngayon ako'y sa bisyo nalulong na tunay

sa tukso ako ay naging lubhang mabuay

sa aking pagharap sa mga nagawang pagsuway

mapagpatawad Mong yakap sa akin pa ri'y binibigay

patawarin Mo po ako sa mga nagawang pagkakamali

lahat ng habilin akin sadyang nabali

kinalimutan Ka sa mga oras ng tagumpay

sa kagipitan ngayun sa Iyo'y kumakaway

Mahabaging Ama di ko na po alam ang aking mga nagawa

puno ng pagsisi habang tumutulo ang mga luha

ako po'y naging isa itim na tupa sa Inyong pastulan

sa nalalabing kong oras, kapatawaran sana ay aking makamtan

Salamat po sa ibinigay Nyong buhay na mahiwaga

totoo pong nasa huli ang pagsisisi at pagtitika

uubusin ko ang mga huling sandali ng aking hininga

sa pagpupuri sa Iyo, O Diyos na puno ng awa

Setyembre 21, 2007

Mga katha ni Zack na matatagpuan sa Sali Ka, Kabayan

• ▪ TULA
• ▪ Ampalaya Matamis!!!
• ▪ Dapit-Hapon