LUHA

                    I

Minsan sa mga mata ko’y may luhang pumatak

iyon ay dahil sa ako’y nagagalak;

pagka’t yaring mithi’y akin nang natupad,

naging bunga niring aking pagsisikap.

Nang ang batas ni Tatay ay aking nilabag,

ako ay kaniyang pinagalitan agad;

at sa aking sarili ako ay nahabag,

luha sa mga mata ko ay agad nalaglag.

Totoo pala at talaga palang masaklap

ang mawalan ka ng isang kaanak;

pagtangis ay di agad maampat-ampat,

sa mga naulila ay habag na habag.

Masaganang luha ang nag-uunahan

na sa aking mata’y hindi ko napigilan;

sa paano ako ay tunay na nasaktan

nang ang mahal gumuho ang paninindigan.

Anupa’t sa aking mga naging pagluha,

ang huli ang siyang dinamdam na sadya;

akin lang hiling sa Poong Lumikha,

tulungang mapawi sanhi ng pagluha.

Yaring hinagpis mandi’y napaparam

sa patnubay marahil ng Poong Maykapal;

akin lang sa Kanya’y muling kahilingan,

kung muling magmahal LUHA’Y maiwasan.

                    II

Hiling na maiwasan luha sa muling pag-ibig,

tila ang Diyos yata… ako’y hindi dininig;

pagka’t ang puso nang maramdaman muling pagpintig,

karupukan ng unang inibig muling naulit.

Nguni’t mali pala ako sa aking inakala

na hindi dininig hibik nitong Diyos na mapagpala;

pagka’t masidhing hiling na sa Pag-ibig di lumuha na,

sa Diyos ng Pag-ibig, naisip ko maling kahilingan pala.

Pagka’t ngayon higit ko nang naunawaan

na sa Pag-ibig palang Diyos ang pinagmulan,

sadyang kasama na ang mga Pagluha’y maranasan,

salit-salit na tuwa, hapis, nguni’t sa huli’y kaluwalhatian.

Sa halip mas maganda palang hilingin natin,

TURO NIYANG PAG-IBIG, matutuhan nating taimtim;

dahil kung wala nga sa Kaniya, mahirap ngang gawin,

di lumuha’t tumangis kung minahal di naging tapat sa atin.

Mga katha ni Josephine Castelltort-Jaylo na matatagpuan sa 

Sali Ka, Kabayan

• ▪ TULA
• ▪ Luha
• ▪ Pag-ibig ay ano nga ba?
• ▪ Tanging dalawang pagpipilian
• ▪ Masaya ka ba?
• ▪ Mga tanong ng kabalintunaan
• ▪ Aral o ligaw, o puwede bang sabay?