BUGSO NG GUNITA

ni Bert Cabual

PASINTABI | PAALAM, MAHAL KO! | NASA ISIP KITA, NAYON KO | ITO BA ANG LONDON? | LONDON AT MAYNILA | SIPAG-PILIPINO | HAWIG NG PALAD | PAGHANGA | KAMAYANG KAY PINA

ITO BA ANG LONDON?

Sumadsad sa lupang panaho’y taginaw

yaong eroplano naming sinasakyan;

ito ba ang London?—bansang inaasam,

pag-asang hahango sa karalitaan.

Nang sa paliparang gusaling malaki

ay magsunud-sunod na manaog kami;

mga awtoridad doong nagsisilbi,

sa pagsisiyasat ay di mapakali.

Sinalang buklatin at basahing lahat

yaong kasulatang taglay sa paglipad;

pagka’t pasaherong di-Puti ang balat,

pinagdududahang papeles ay huwad.

Kaya nga ba’t ako’y inulan ng tanong,

kung anong layunin sa ganito’t gayon;

itinanong pa ring kung habang panahong

mamumuhay ako sa lungsod ng London.

Sa tanong na yaon, ako ay sumagot,

“sa Londo’y di ako maninirang lubos;

sa pagsisinop ko’y kapag nakaimpok,

sa sariling bansa’y uuwing may lugod!”

Wika ko’y di ako lubhang magtatagal

na lumagi rito sa lupaing hiram;

babalik din ako sa bayan kong mahal,

pagka’t Pilipinong may buhay at dangal.

Ang aking sinabi ay nilimi nila

at ang papeles ko ay nilagdaan na;

ako ay humayong buong pagtataka—

bakit sa dayuhan ay ganito sila?

 

KASUNOD > LONDON AT MAYNILA

PASINTABI | PAALAM, MAHAL KO! | NASA ISIP KITA, NAYON KO | ITO BA ANG LONDON? | LONDON AT MAYNILA | SIPAG-PILIPINO | HAWIG NG PALAD | PAGHANGA | KAMAYANG KAY PINA