PAG-ASA NG BAYAN

ni Deenah Macatiis

​

Dalaga, dala na, o merong asawa

Sa hirap ng buhay, hangad mo'y iisa

Iahon sa dusa ang abang pamilya

Nag-abroad ka upang

     kumita ng lapad

          maski na magputa.

​

Naging Japayuki at naging Mama-san

Kumabit sa kahit na sinu-sinong San

Nag-recruit ng kapwang sikmura'y nakalam

Weather-weather lang yang,

     noon: sila bugaw,

          ngayon naman: ikaw.

​

Eh ano kung bugaw? Eh ano kung puta?

Tao'y kanya-kanyang diskarte't dilhensya

Ano'ng pipiliin? Maging terorista?

Mangidnap-for-ransom?

     Mang-agaw ng cellphone?

          Mag-rally sa Edsa?

​

Saka meron pa bang ibang aasahan

Liban sa sariling sikap at paraan?

Hawak mo ang susi sa kinabukasan

Kaya nga Bayani

     ang turing sa iyo

          ng ating lipunan.

​

At habang abala sa kaban ng bayan,

Press release, interbyu, debate, bangayan

Ang Kongres, Senado, at ang Malakanyang

Umaasa kami

     sa iyong patuloy

          na monthly remittance.