INAY… ITAY…

ni Rafael A. Pulmano

Inay, kumusta po kayo sa Singapore?

Itay, kumusta rin po riyan sa Taiwan?

Sana po, ngayon na ang inyong bakasyon

Para sama-sama na tayo sa bahay.

Sabi po ni Lola ay mahal n'yo ako

Kaya nagtitiis po kayo sa abroad

Salamat po, Inay...Itay, salamat po

Sana'y patnubayan po kayo ni Jesus.

Natanggap ko na po ang package n'yo, Itay

Manika, chocolates, at baby computer

Sabi po ni Lolo, dumating din, Inay

Ang dollar na inyong pa-birthday sa akin.

Mga kalaro ko'y inggit po sa akin

Mayaman daw tayo, hindi tulad nila

Pero Inay, Itay... ako po'y inggit din

Masaya po sila, buo ang pamilya.

Inay, kumusta po kayo sa Singapore?

Itay, kumusta rin po riyan sa Taiwan?

Sana po, ngayon na ang inyong bakasyon

Miss na miss ko na po kayo, Inay... Itay...