BITIN

ni Rafael A. Pulmano

Dear, Happy Anniversary! 

        O kaybilis ng panahon!

O kaysarap gunitain 

        ng lumipas na panahon…

Mga paslit pa lang tayong

        naglalaro sa maghapon,

Hanggang kapwa nakatapos,

        nagkalayo after high school,

Sa puso ko, noon pa man,

        may pag-ibig nang umusbong

Lumago at namukadkad,

        naging baliw na obsesyon

Kaya laking tuwa minsang

        muli tayong nagsalubong,

Sa agad kong pagtatapat

        ay “oo” ang iyong tugon.

Walang araw, walang gabing hindi tayo magkapiling

Laman ka ng panaginip sa sandaling mapahimbing

Nang tayo ay ikinasal, sa dambana pagbikisin,

Kasiyahan sa dibdib ko, tila walang pagmamaliw

Kung ako ang masusunod, buong buhay gugugulin

Sa piling mo, wala na ‘kong anupamang nanaisin

Nguni’t tayo, sa pag-ibig, gaano man kataimtim,

Sa mundo'y di mabubuhay kung kapos sa makakain.

Nais nating makaipon, makapundar, guminhawa

Ang buhay at kabuhayan ng pamilyang ibubunga

Kaya unang taon pa lang ng nabiting pagsasama

Ay nangibang-bansa ako at sa Saudi ay nagpunta.

(Nagpakasal tayo noon para laging magsasama,

Pagkatapos, naglayo rin nang dahil sa ekonomya.

Hindi tayo sa ‘enchanted kingdom’ kasi nakatira,

Kaya, Darling, konting tiis, wag mawalan ng pag-asa.)

Tuwing ako’y magre-renew 

        ng kontrata taun-taon,

Usapan ay isang buwan 

        ako pwedeng magbakasyon

Kaya tayo, aking Mahal, 

        kada Hunyo, ay honeymoon

Isang buwang nasa silid 

        at maghapong nagkukulong

Hindi naman nasayang ang 

        pagtitimping aking ipon

After twelve years, sinuwerteng 

        nakabuo ng girl at boy

At ngayon nga, dahil twelve times 

        na tayong magre-reunion,

Happy First Year Ann'versary! 

        I'm coming home... I'll see you soon!

Maraming salamat kay bayaw Ludi, na nagbigay ng idea at inspirasyon para mabuo ang tulang ito, at sa kanyang magandang maybahay na si Dodi, na nagpaunlak na mapalagay ang kanilang larawan sa pahinang ito. – Rafael A. Pulmano