BATANG SAUDI

ni Rafael A. Pulmano

'Sang kahig, 'sang tuka

      Madalas ay wala

Pamilya'y kawawa

      Tutunga-tunganga.

Sawa na sa hirap

      Ibig ay lumasap

Ng ginhawa't sarap

      Na pinapangarap.

Nangutang ng pera

      Sa Saudi nagpunta

Nagtiis, nagdusa

      Para lang kumita.

Halos paalila

      Sa Arabong bansa

Sa katitiyaga

      Nakamta'y nilaga.

Umuwi ng bayan

      Mayaman, mayabang

Nagpista sa bahay

      Ang mga kaybigan.

Halos araw-gabi

      Naghahapi-hapi

Itong batang-Saudi

      At barkadang-bote.

Dumating ang araw

      Ay sa kagu-good time

Ang naipong riyal

      Natira'y lalagyan.

'Sang kahig, 'sang tuka

      Madalas ay wala

Pamilya'y kawawa

      Tutunga-tunganga.