SONETO SA ATING ANIBERSARYO

(Handog sa Maybahay Kong si Ludy Cabual)

ni Bert Cabual

​

​

​

​

​

​

​

​

​

​

​

​

​

​

​

​

​

​

​

​

​

Sa takipsilim ko’y ikaw ang bituin

Na tanglaw sa aking pusong naninimdim;

Sa madaling-araw ang tala’y ikaw ring

Kukuti-kutitap kung ako’y magising.

​

A! ang aking puso’y muling umiibig

Sa iisang mutyang kapilas ng langit;

Ikaw, walang iba, ang muling umakit

Sa aking makulay na pananahimik.

​

Marami nang taong tayo’y magkasama

Sa iisang mithi at pamamanata;

Ang tamis at pait ng tuwa at dusa

Ay hinarap nating buhay at pag-asa.

​

(Tanggapin mo, giliw, ang aking soneto

Sa ating maringal na anibersaryo!)