HAPPY VALENTINES

ni Rafael A. Pulmano

Nang mga panahong masigla pa’t bata

Hanggang magsimulang magbuhay-binata,

Baliw ang isipang buo ang tiwala

Na kayang sungkitin

     ang araw, ang buwan,

          bituin at tala.

Nang makilala ka’y doon naunawa,

Kabaliwang turing pala’y talinghaga;

Ang katotohanang nagmula sa diwa:

Ikaw pala’ng tala,

     araw, b’wan, at bit’wing

          sa puso’y papana!

Ang Happy Valentines sa pinipithaya,

Pa’no ihahatid ngayong ikaw’y wala?

Malawak ang dagat, malayo ang lupa,

(At ang pamasahe

     sa United Airlines

          ay di bumababa!)

Sa bulaklak, Mahal, Giliw, Irog, Sinta

Init ng pagbati ay ipadarama,

Kalakip ng pusong wagas sa pagsinta

Kahit may puti na

     buhok natin, saka

          apo’y sangkaterba…

Love,

Paeng

2-14-2018

Pohnpei, FSM