KALIMUTAN MO NA

Salin sa Tagalog

ni Rafael A. Pulmano

​

Kalimutan mo na

   Ang nagdaang araw

      Na lubhang maulap

Datapuwa't huwag

   Limutin ang oras

      Na lipos ng galak

​

Kalimutan mo na

   Ang araw na ikaw'y

      May luha sa mata

Datapuwa't huwag

   Limutin ang ngiti

      Nang ikaw'y masaya

​

Kalimutan mo na

   Iyang kabiguang

      Dinanas sa buhay

Datapuwa't huwag

   Limutin ang mga

      Tinamong tagumpay

​

Kalimutan mo na

   Ang taong sa iyong

      Puso'y nakasugat

Datapuwa't huwag

   Limutin ang sa yo'y

      Nagmahal nang tapat

​

Kalimutan mo na

   Ang pagkakamaling

      Di na mababago

Datapuwa't huwag

   Limutin ang aral

      Na iniwan nito

​

Kalimutan mo na

   Ang maraming balak

      Na hindi natupad

Datapuwa't huwag

   Limuting magkaro'n

      Ng isang pangarap.

Sulatan po kami kung mayroon kayong komento o puna tungkol sa kathang ito.