BALAGTASAN

PAKSA: GIYERA LABAN SA DROGA

TANONG: SANG-AYON o TUTOL ka ba 

sa pinaiiral na sistema ng kasalukuyang 

pamahalaan hinggil sa pagsugpo 

sa suliranin ng droga sa Pilipinas?

LAKAMBINI (Bahagi ng pawagan at paanyaya)

Luzviminda Inangbayan ang lingkod n'yong nagpupugay

Lakambining papagitna sa dalawang magbabangay;

Si Masigasig Magtanggol – SANG-AYON ang kakampihan,

Dinapoco Macatiis – ang panig ay TUTOL naman;

Simulan na agad natin, at ang unang isasalang:

Ang makatang si Magtanggol...Masigabong palakpakan!

SANG-AYON (bahagi ng unang tindig)

Isa rin po naman akong tahimik na mamamayan

Marubdob na naghahangad na tumino itong bayan

Kaya ako'y walang tutol sa gobyernong pamaraan

Na pitasin ang masama at silabin sa tambakan

Kung sa gayon mapupuksa kaluluwang pawang halang

Maluwag kong tatanggapin ang sistemang umiiral.

TUTOL (bahagi ng unang tindig)

Sa paraan ng gobyerno ako raw ba ay sang-ayon

Na ang droga ay sugpuin? O ako ba'y tumututol?

Ang layunin ay maganda! Payag ako sa himatong

Na ang droga ay puksain upang ganap na malipol;

Nguni’t bulok ang sistemang di ko hangad na ibangon,

Pagka’t di ko ginugustong magnegosyo ng kabaong!

TUNGHAYAN ANG BUONG KATHA > BALAGTASAN: GIYERA LABAN SA DROGA

TUNGKOL SA TAMPOK NA KATHANG ITO

ANG BALAGTASANG ito ay nabuo sa tulong ng mga kaibigan at kasamahang makata, na ang karamihan ay sa Facebook lamang nagkakilala. Lahat ay kasapi ng GIMIKan TULAan at BIRUan sa Bahay Kubo (GTB), isang lihim na grupo sa nasabing social network.

Narito ang pangalan ng mga kontribyutor at ko-awtor ng balagtasang ito, ayon sa hanay na alpabetikal ng kanilang huling pangalan:

    •    Roni Abanador (Italy)

    •    Bert Cabual (England)

    •    Mateo Escalante (Philippines)

    •    Eclipse Heart (Singapore)

    •    MVenus Peralta Magbanua (Philippines)

    •    Ellen Malapitan (Philippines)

    •    Paul Mapalad (Philippines)

    •    Ricky Medrano (Italy)

    •    Felix Ramos (United Arab Emirates)

Isang malaking pasasalamat ang ipinaabot ng inyong lingkod, na nagsilbing patnugot at nag-ambag din ng ilang bahagi (kabilang na ang sa iskrip ng Lakambini) sa mga nabanggit na makata at ka-GTB sa itaas.

TUNGHAYAN ANG BUONG KATHA > BALAGTASAN: GIYERA LABAN SA DROGA