SALI KA, KABAYAN!
Mga tulang katha ng ating mga kababayan mula sa iba't ibang panig ng daigdig, na tumatalakay sa iba't ibang karanasan, damdamin at kaisipan; mga pangarap, kabiguan at tagumpay. Ipadala ang iyong sariling-kathang tula sa Sali Ka, Kabayan! at ibahagi sa buong mundo ang iyong likha.
- ZALDY ALORA (U.S.A.) - Bagama't sa Amerika na naninirahan, buong puso pa ring ipinahahayag ni Zaldy na siya'y taga-Biñan, isang bayan sa Pilipinas kung saan maipagmamalaki mo hindi lamang ang mga produkto kundi maging ang mga mamamayan nito.
- ONOFRE CAMARILLO (U.S.A.) - Saan mang bansa sa daigdig may mga Pinoy, asahan mong may mga Filipino community associations na gaya ng Golden Leaves sa Chicago, Illinois kung saan ang batikang Laguna Scouter na si Mr. Camarillo, hanggang sa edad na siyam na dekada, ay aktibong naglingkod bilang opisyal ng samahan.
- GONIE MEJIA (SAIPAN) - Si Gonie, isang magsasaka at batikang makata na nakilala ko at naging matalik na kaibigan sa Saipan, ay hindi nakalilimot sa kanyang pinagdaanang hirap, sa kanyang bayang Pilipinas, at sa Panginoong Maykapal, gaya ng isinasaad sa kanyang magandang tula: Bawa't Pawis, Bawa't Luha.
- DOMINGO TOLENTINO (SAIPAN) - Si Ka Domeng, isang construction worker na may malamig na tinig at mahusay bumigkas ng tula, ay nakilala ko at nakasama sa pakikipagbalagtasan sa Saipan. Madalas siyang lumikha ng mga tulaing madamdamin at punung-puno ng pag-ibig, gaya ng isang ito na may pamagat na Damdamin.
- EDU CARPENA (SAUDI ARABIA) - Ang Minsan Pang Ginahasa Ang Kalayaan, na nilikha at inilahok sa isang patimpalak sa Jeddah, Saudi Arabia noong Mayo 1997, ayon kay Edu ay "inspired by the highly publicized story of Sarah Balabagan."
- MONALIZA MONDATA (CANADA) - Pagmamahal, pagkakamali, pagsisisi, paghingi ng tawad, pagbabago, pagasa... Ilan lamang sa damdaming ipinahahayag ng sa Pinakamamahal Naming Ina.
- MARIA TERESA CURA REA (AUSTRALIA) - Akala ng iba, kapag nakapag-abroad ka, wala ka nang dapat hanapin pa sa buhay. Sa tutoo, bagama't maraming benefits, meron din naman itong kaakibat na headaches at heartaches, gaya ng pinapaksa ng unang tula ni Maria Rea, ang Pagsisintir Ng Isang Pinoy-Aussie. Puyat sa pag-iimpake ng bagahe, pagod sa mahabang biyahe, pananabik sa mga mahal sa buhay na matagal na napawalay sa piling...Sari-sari ang naglalaro sa isipan at damdamin ng isang nagbabalikbayan ang nilalaman ng kanyang ikalawang tula, ang Samu't Saring Damdamin, Tagaktak Ang Pawis
- ROSELYN ALEGONZA - Sa kanyang kathang Buhay OCW, may magandang mensahe si Roselyn sa mga Pinoy na nasa ibang bansa: Pakaisipin palagi ang pamilyang naiwanan. Sakaling maiahon na sa kahirapan, bigyan sila ng natitira mo pang panahon, pagkat di lang salapi ang kailangan nila kundi pagmamahal. Sa Tinig Marino, ito ang tanong ni Roselyn: Bakasyong labis na kinasasabikan, pagreretirong inaasam-asam sa panahon ng kahinaan at katandaan...meron naman kayang maaasahan sa ating pamahalaan?
- TREZ MUSKITEROS- Kabiguan sa pag-ibig, di pagsunod sa aral ng ina, pakikipagsapalaran sa malayong bansa, at inspirasyon mula sa mga minamahal na anak . . . Ito ang ipinahahayag ng makulay at madadamdaming tula na padala sa atin ng may-akda.
- HANA BLUE 23- Bakit nga ba ang pag-ibig, kahit dumating sa maling panahon, ay mahirap iwasan at hinahanap-hanap kahit nababatid ng nagmamahal na ito ay bawal? Tunghayan at alamin kung bakit ang pamagat ng tulang likha ni Hana Blue23 ay Hiram.
- VIC YAMBAO (U.S.A.) - Sa dalawang tula, Pangarap at Panagimpan, may mga tanong at may mga pagbabagong inaasam si Vic na kung matutugunan o matutupad lang sana, aniya, ay mas matamis pa ring umuwi at manirahan sa sariling bayan.
- ROLAND MANREAL (GUAM) - Madamdamin at may bahid ng pagsisisi at panghihinayang ang tulang Sana, Mabalik Ko Ang Kahapon na padala ni Roland L. Manreal na nakatira sa Guam mula pa noong 1986.
- REGINA ROSALES (U.S.A.) - Maraming salamat kay Ms. Regina Rosales na kumatha ng isang magandang tula, Salamat Sa May-Akda, na sa kabila ng pagiging isang dayuhan sa ibang bansa ay nagsasabing siya'y mapalad dahil batid niya ang kanyang karapatan.
- LAURA BALATBAT-CORPUZ (U.S.A.) - Ang tubig ay maihahambing sa buhay ng tao, ayon sa tulang ito na pinamagatang Ang Tubig. Basahin rin ang iba pang tula ni Laura: Araw ng mga Ina, Dahilan...Tinapay, Munting Rosaryo, Pangungulila, at Ugaling Pilipino.
- JUVEL REMPIS (Micronesia) - Magkakahalo at magkakasalungat na damdamin ng lungkot, tuwa, pangungulila sa mga iniwan, at pasasalamat sa Maykapal sa biyayang nakamtan, ang inilalarawan sa kanyang magandang komposisyon, Ang Umalis sa Sariling Bayan.
- RAMIL ILAGAN (Micronesia) - Matibay na tindig, matikas na tayo, inspirasyon ng puso... Ilan lamang sa mga katagang hinabi ni Ramil upang ipahayag ang paghanga at pagpapahalaga sa Ponape na nagsisilbing pangalawang tahanan para sa mga OFWs na pansamantalang naninirahan at naghahanapbuhay sa islang ito.
