BLOGTALASAN NG KATWIRAN


Executive Privilege vs. People's Right to Know

Sa kaso ni Neri na tumangging sagutin ang ilang katanungan
sa pagdinig ng Senado hinggil sa kontrobersyang
ZTE National Broadband Network Deal,
alin ba ang nararapat bigyan ng higit na pagpapahalaga:
Pribilehiyong Ehekutibo ng Pangulo?
o Karapatan ng Mamamayan na Malaman ang Katotohanan?



butsikik says:
HONESTY IS THE BEST POLICY!

Tuwina’y naririnig, “Honesty is the best policy!”
Maaga kong natutunan sa klase sa GMRC;
Pangaral ng magulang, pagsisinungaling ay iwaksi,
Mabuhay sa katotohanan at dignidad sa sarili!

Karapatan ng balana ang malaman ang totoo,
Kaya’t ‘di dapat magtago sa saya ng pangulo;
Kahit ano’ng pagtatakip ay sisingaw din ang baho,
Mabuti pang magnanakaw, sa tao ay ipagkanulo.

Posisyon ng pangulo ay takda ng mamamayan,
Pampublikong pwesto’t pag-aari ng taong-bayan;
Marangal na tungkulin kung halala’y walang dayaan,
Kaya’t dapat na pundasyon ay ibayong katapatan.

Kung walang kabulastugan, bakit matatakot?
Dapat ay magiliw pa sa mamamayan ay magreport,
Pribilehiyong ehekutibo ay tao ang nagdulot,
Kaya’t mahalagang ibigay sa kanila ang sagot!

aruykuykuy says:
HINDI LAHAT NG TOTOO KAILANGANG ISAPUBLIKO

Aruy! Aruy! Si butsikik, bumanat na, daplis naman
Walang dapat pagtalunan sa tinurang kasabihan
“Honesty” nga’y “best policy” ngunit ano’ng kinalaman
Sa malinaw pa sa araw na paksa ng BlogTalasan?

Pribileh’yong Eksekyutib kung masusing susuriin
Mahalagang ingrindyente sa pagtupad ng tungkulin
Hindi lamang ng Pangulo kundi kahit sinong lider
Ma-publiko o pribado, di pwede ang walang lihim.

Ang sikreto’y kailangan upang mapangalagaan
Ang relasyong pangkalakal at panlabas na ugnayan
Lihim na pangseguridad, sensitibong kaalaman,
Hindi pwedeng isiwalat nang basta lang sa lipunan.

Kung Pangulo’t gabinete, nagpupulong sa Palasyo
May bahagi ng usapang hindi para sa publiko
Ngunit hindi kahulugang ang bayan ay niloloko
Hindi komo di nakibo, dishonest ang isang tao.

Karapatan man ng bayan ang totoo ay mabatid
Hindi lahat ng totoo ay pupwedeng isa-public
Ang pagkain ng Pangulo, pagpaligo at pag-idlip
Totoo man, di na dapat busisiin pa ng Senate.

butsikik says:
MAY GUSOT LANG ANG INUUNGKAT

Ek! Ek! Ek! Ek! si aruykukuy ay nagpapatawa,
Singit ng singit, paksa ay hindi muna binasa;
Wala po akong sinabing lahat ay ibulgar nila,
Kundi bigyang liwanag ang sa ZTE‘ng anomalya.

Hindi ko po kinokontra ang kaniyang disposisyon,
Natural lang na may lihim ang isang organisasyon;
Nguni’t kung humihiling na ay ang mayorya ng nasyon,
Hindi baga’t pagtatapat ang tunay na solusyon?

Higit bang pahahalagahan interes ng dayuhan,
Hindi pwedeng magalit baka tayo ay pabayaan;
Demokrasyang sinasabi paano patutunayan,
Kung inaapi’t sinisikil ay sariling kababayan?

Di ko rin po sinasabi na si Neri ay dishonest,
Dahil ‘di naman nagsalita ang dapat ay star witness,
Nguni’t kung panunungkulan ay maayos at malinis,
Magsalita sa taumbayan ng pagdududa ay maalis.

Aruykuykuy paalala, hindi lahat iniuungot,
Di rin tinatanong ilang beses si Gloria umutot;
Inuungkat lang po ay mga transaksyong may gusot,
Utang sa taumbayan ang makatotohanang sagot!

aruykuykuy says:
NAHATULAN NA ANG KASO

Aruy! Naku! Si butsikik na ang tuktok ay may ek-ek,
Halata mong may kandado ang utak at “one-way traffic”
Sa usapin ng ZTE, Supreme Court na ang nagsulit
Kinatigan ay si Neri at ang Exec’tive Privilege.

Problema lang sa Senado, na nagsampa ng petisyon
Nasaktan ang amor propio, naghain ng bagong mosyon
Para bulatlating muli’t bigyang rekonsiderasyon
Mali daw ang Mahistrado! Senado ba’y mas marunong?

Sa palakasan, butsikik, kung palaging sinisisi
Kada sipaw, kada senyas ng “Foul!” ng tokang reperi
Walang larong matatapos, walang kampeong masasabi
Kasi, kapwa naglalaban, gusto’y sila tamang pirmi.

Saka naku! Wala na bang katapusang moro-moro
Ang paggisa sa ZTE maski tapos na ang kaso?
Gutom na ang taong bayan, may problemang mas seryoso
Importante ngayo’y bigas kaysa the public’s right to know!

May krisis di lang ang bansa kundi buong daigdigan
Kinakapos na sa ani, may banta ng kagutuman
Isiwalat man ni Neri ang lahat nyang nalalaman
Ang pagpila sa NFA, mas uunahin ng bayan!

butsikik says:
NALILIGAW NG LANSANGAN

Ek! Ek! Ek! Si aruykuykuy ay halatang nasukol,
Wala ng magandang maipuntos kaya nag-uungol;
Hindi po lahat ng legal ay siyang tamang hatol,
Ang higit na mahalaga’y katarungan ang matukoy.

Pinagtataluna’y alin ang mas may kahalagahan,
Exec’tive Privilege o karapatan ng mamamayan,
Ngunit si aruykuykuy naliligaw ng lansangan,
Bigas at public’s right to know ang pilit tinitimbang.

Paano mababatid lantay na katotohanan,
Kung desisyong magsalita’y dadaanin sa botohan,
Kung si Erap pinabagsak sa sobreng ‘di pinabuksan,
Ngayo’y bakit pinipilit na si Neri ay busalan?

Kaya nga nagtatagis ng galing sa palakasan,
Ay ipinapakita lahat ng talentong taglay;
Hurado ay humahatol sa pagtatapos na ng laban,
Hindi sa umpisang ginagapos agad ang kaaway.

Aruykuykuy wag kang tumakas sa nakahaing paksa,
Alam kong maraming nagugutom, mga maralita,
Kaya nga’t kailangan ng si Neri ay magsalita,
Maresolbahan at matigil pagnanakaw sa madla.

aruykuykuy says:
KARAPATANG DI NAKABUBUSOG

Aruy! Naman… naman… naman…! Hindi ako nasusukol
Katunayan, lamang ako sa puntos kung ang hahatol
Ay di paris ni butsikik na ang I.Q. ay very small
Kinekenkoy ang katwiran pag wala nang maitugon.

Maliwanag ang sabi ko, may hatol na ang hukuman
Dahil dito’y mas mabuting ibaling ng pamahal’an
Ang atensyon sa mas lalong kailangan ng lipunan
At hayaang makausad ang bayan sa kaunlaran.

Kahit ga’no kahalaga na malaman ng publiko
Ang lahat ng anomalyang nasasangkot ang palasyo
Kung sa huli’y magugutom, maghihirap rin ang tao
Impormasyong nasiwalat, makakain baga ito?

Magtrabaho na lang tayo’t hayaan ang Presidente
Sa pagganap sa tungkulin, bigyang-luwag sa diskarte
Igalang ang prib’lehiyo sa Presidential Secrecy
Na kabilang sa pundasyon ng tunay na democracy.

Ating bansang nalulublob sa putik ng pulitika
Wag na sanang lunurin pa sa kawalan ng pag-asa
Karapatan ng publiko’y ginagamit lang ng media
Na ang kita’y kitang-kita sa paglikha ng intriga!

butsikik says:
HUWAG ITAGO ANG BAHO

Ek! Ek! Ek! Very small daw ang I.Q. ni butsikik,
Ayon kay aruykukuy na sa tulaan ay matinik;
Ngunit natuklasan ko sa aking pagsasaliksik,
Nais ni aruykuykuy, si Gloria ay mapatalsik.

Sinabi ko ito para sa madla ay maipagbilin,
Ito pong si aruykuykuy kung mag-isip ay balimbing;
Sa nakahaing paksa kung inyo pong susuriin,
Sala siya sa pwesto’t iba ang pinaghahambing.

Ayaw ko sanang lumihis sa paksa ng BlogTalasan,
Ngunit si aruykuykuy ay ‘di patas kung lumaban,
Sa paksa po ay maliwanag na ang pagtatalunan,
Exec’tive Privilege o karapatan sa katotohanan.

Kanyang ipinipilit na ibinaba na ang desisyon,
Oo nga’t meron na, pero bayan ay nagtatanong;
Bakit hindi nila hayaang si Neri ay tumugon?
Katotohana’y wag supilin ng mga butihing hukom.

Karapatan daw sa totoo ay hindi makakain,
Pagtatago ba ng baho at maiitim na lihim
Ay pwede ring pamalit sa panghaing kanin?
Kumakalam na ang tiyan, isip ay tighaw pa rin.

Magtrabaho na lang daw tayo’t hayaan ang pangulo,
Huwag ng pakialaman pagnanakaw panloloko,
Presidential Secrecy‘ng nagtatago ng mga baho,
Democracy sa Pangulo, ang bayan ang uto-uto!

aruykuykuy says:
HIGIT SA PEOPLE’S RIGHT TO KNOW

Aruy-king-king! Si butsiking! Kinakapos na ng baon
Binabago ang usapan, lumang paksa’y nililingon
Ibang isyu, ibang sagot; bagong tanong, bagong tugon
Wag iligaw ang publiko! Tutukan ang takdang hamon!

Hamon dito’y maliwanag: Sa pagtestigo ni Neri
Sa Senado hinggil diyan sa kontrata ng ZTE,
Alin ba ang mas matimbang? Arroyo’s claim to secrecy?
O people’s right to be informed sa tunay na pangyayari?

Oy! butsikik, makinig ka: di kasali sa usapan
Kung dapat o hindi dapat paal’sin sa Malakanyang
Si GMA, lalong hindi saklaw ngayon ng usapan
Ang wika mo’y pagbalimbing ng isip kong niyurakan!

Kung mabigat sa puso mong tanggapin ang naging pasya
Ng Supreme Court na co-equal o kapantay na ahensya
Ng Pangulo at Senado - at Highest Court ang turing pa,
Mayron pa bang mas hihigit na qualified sa paghusga?

Uulitin ko, butsikik, kung di mo pa nasasakyan
Ang panig ko: Sa ZTE, mas higit na kailangan
Ng Pangulong makakakilos nang di nag-aaagam-agam
Na detalyeng sensitibo’y uungkatin pa ng bayan.

Sa ZTE - makinig ka! - higit sa people’s right to know
At paghanap sa hustisya, kung ikaw nga ay seryoso
Na lahat ng nasasangkot magdusa sa kalaboso
Wag sa Senate, sa hukuman magsampa ka ng reklamo.

Sa hukuman, matitimbang kung alin ang testimonya
Na hearsay o sabi-sabi, o may baseng ebidensya
Magkagayon, taumbayan, akusado’t nag-akusa
Sa search for truth and for justice, pantay-pantay na may tsansa!

butsikik says:
SA SENADO UMPISAHAN, TAPUSIN SA HUKUMAN

Sa wakas natuto rin si aruykukuy na sumunod,
At aaminin kong may puntos ang kaniyang mga sagot;
Nguni’t huwag naman siyang basta magpatianod,
Magbulag-bulagan sa dumi ng gobyernong buktot.

Hindi ko po kini-question ang hatol ng mga hukom,
Pangamba ko lamang ay tila wala pa sa panahon,
Paanong sa korte isasampa reklamo’t mga hamon,
Gayung ‘di pa nag-uumpisa, bibig ay pinapatikom.

Pangulo ang pinakamataas na pinuno sa bansa,
Malaking responsibilidad ng pangangasiwa,
Kung walang iregularidad, walang anomalya,
Bakit matatakot na sa publiko ay magsalita?

Paalala aruykukuy, hindi lahat ng hurado,
Ay sumasang-ayon sa pagkukubli ng mga baho;
Kung pantay ang karapatan, pagsalitain ang testigo,
Umpisa senado, sa hukuman tatapusin ang asunto!

aruykuykuy says:
IBA NA LANG ANG ATUPAGIN

Kay butsikik ay Salamat! sa puntos na kinilala
Tinitiyak ko rin naman na dilat ang aking mata
Tanggap ko rin na gobyerno ay lublob sa anomalya,
Na di lahat ng Hurado iisa ang naging pasya.

Sa panig na kinampihan at binigyang-pagtatanggol
Doon kami nagkalayo ang landas na tinutunton
Kay butsikik mas matimbang, public’s right to information
Samantalang Executive Privilege ang aking tugon.

Mahalagang isaisip na ang panig naming pili
Sa sitwasyon lang ni Neri at Senado natatali
Saksi kayo sa resulta, bansa’y lalong nahahati
Hindi na nga maresolba, problema pa’y tumitindi.

Mangyari nga, nakatuon ang pansin ng lahat-lahat
Sa nagmukhang teleseryeng pagbusisi’t pag-uungkat
Sa baho ng Malakanyang na press at media ang bundat
Imahe ng Pilipinas patuloy na winawasak!

Kaya aking uulitin, Senate hearing ay itigil
Mga bahong hinalukay, sa hukuman na lang dalhin
At sa halip na ang sikret ni GMA ang kudkurin,
Mga batas sa pag-unlad ng bansa ang atupagin!

renz says:
DAPAT MAKIALAM

Sadya akong nalilibang… Mainit na pagtatalo
Sa tagisan ng katwiran wala yata na susuko
Aruykuykuy at Butsikik pwede po bang makisalo?
Di mapigil ang sarili na magbigay ng komento.

Ugali daw nitong audience ng matamang nakikinig
Sa madaldal ng speaker na bida sa isang topic
Ang loob ay nakuha raw kung siya ay natahimik
Dili naman kung sya’y kontra bigla na lang na aalis.

Mainam nga kung si Juan, may ugaling nagtatanong
At maglinaw lalo pa nga’t isyu ay napapanahon
Hindi ba nga sa seminar at maging sa isang classroom
Ay masiglang talakayan kung lahat may partisipasyon?

Kaya nga at dapat lamang taong bayan ay malaman
Sa ngalan ng transparency mayro’n namang karapatan
Ang usaping ZTE deal kung ito ay legal naman
Walang dapat ikatakot Palasyo ng Malacanang.

Sa makatang nagtatalo lubos akong humahanga
Sa tagisan ng katwiran wala akong binabangga
Nais ko lang isiwalat ang dikta ng aking diwa
Di ko kayang manahimik sa ganitong mga paksa.

© 2015 Rafael Pulmano  |  Template design by Andreas Viklund