Site menu:

 



NAPAPANAHON
Si Manny Pacquiao at ang Politika
People Power vs. GMA?

KUNG KAMI ANG TATANUNGIN
Aral at Ligaw
Babae ang Magtatapat
Boksingerong Anak
Diborsyo sa Pilipinas
Hiling ng Magulang
Kapisan sa Bahay ang Biyenan
Matalino vs. Mayaman
Pag-asa ng Bayan
Paglahok sa Pulitika
Pagsasabi ng Totoo
Panghihimasok sa Buhay ng Iba
Pangingibang-Bansa
Pagsasawalang-Kibo ng Naaapi
Pusher na Kaibigan
Tahanan vs. Paaralan


KAYO, BAYAN, ANG MAGPASYA!
Babae ang Manliligaw   
Bakla sa PNP
Bata at Pamalo
Dagdag na taon sa Haiskul
Kapit sa Patalim
Katotohanan sa Pamamahayag
Maganda vs. Pangit
Mahal Mo vs. Mahal Ka
Pagkakaisa ng mga Pilipino
Pakialam sa Pag-ibig ng Anak
Pakikihalo ng Matanda sa SK


SEND EMAIL

 

THANKS TO OUR SPONSORS





ads - group 5
ads - group 6
NAPAPANAHON  Si Manny Pacquiao at ang Politika  |  People Power vs. GMA?
KUNG KAMI ANG TATANUNGIN  Aral at Ligaw  |  Babae ang Magtatapat  |  Boksingerong Anak  |  Diborsyo sa Pilipinas  |  Hiling ng Magulang  |  Kapisan sa Bahay ang Biyenan  |  Matalino vs. Mayaman  |  Pag-asa ng Bayan  |  Paglahok sa Pulitika  |  Pagsasabi ng Totoo  |  Panghihimasok sa Buhay ng Iba  |  Pangingibang-Bansa  |  Pagsasawalang-Kibo ng Naaapi  |  Pusher na Kaibigan  |  Tahanan vs. Paaralan  
KAYO, BAYAN, ANG MAGPASYA!  Babae ang Manliligaw  |  Bakla sa PNP  |  Bata at Pamalo  |  Dagdag na taon sa Haiskul  |  Kapit sa Patalim  |  Katotohanan sa Pamamahayag  |  Maganda vs. Pangit  |  Mahal Mo vs. Mahal Ka  |  Pagkakaisa ng mga Pilipino  |  Pakialam sa Pag-ibig ng Anak  |  Pakikihalo ng Matanda sa SK  


BAKLA SA PNP


DAPAT ba o HINDI DAPAT na payagan
ang bakla sa PNP?


Mula sa panulat nina:
RAFAEL A. PULMANO — nagtanggol sa panig ng DAPAT;
sumulat din ng iskrip ng LAKANDIWA
GONIE T. MEJIA — nagtanggol sa panig ng HINDI DAPAT



LAKANDIWA (Pagbubukas)

Pasintabi muna kami sa lahat ng nakikinig
Sa katwirang maaanghang, tamaa'y wag magagalit
Katuwaan man ang paksa, may mapupulot ring matwid
Kung di kaya ng sikmura, sa tainga ay magtakip.

Paksa natin ay "DAPAT ba o DI DAPAT na isali
Ang bakla sa kapulisan o sa pwersa ng PNP?"
Narito na ang makatang nakahandang magpandali,
Salubungin ng palakpak si Rafael at si Gonie!
 

DAPAT (Unang Tindig)

Isa munang paglilinaw bago magkalabuan po
Sa bakla man kumakampi, lingkod ninyo'y machung-macho
Danga't tawag ng tungkuling dapat akong makibuno
Kaya kahit alanganin ang panig ay di susuko.

Nang panahong sinauna, nung si Gonie musmos pa po
At marami pa sa atin ang wala sa mundong ito,
Ang lalaki, pag naghikaw, ang babae, pag nagkorto,
Tyak malaking iskandalo, tsismis na sa buong baryo.

Pero ngayo'y moderno na ang takbo ng ating buhay
Haircut, T-shirt, at pants - walang sinisino, basta't bagay
Sa trabaho ay ganyan din, lalaki o babae man,
Tomboy, bakla, importante'y kumikita nang marangal.

Sino pa ba'ng magugulat ngayon kapag nakakita
Halimbawa'y ng lalaking guro, narses, kumadrona?
O babaeng sikyu, pulis, boxer, bouncer, karatista?
Kung ang ganya'y tanggap natin, bakit bakla ipepwera?

Ano man ang kanyang lahi, kulay, anyo, kasarian
Ang tao sa mula't mula ay nilikhang pantay-pantay
Kapag merong napaiba, asahan mo't kagagawan
Ng tao ring sa kapwa ay mapandusta't mapanlamang!
 

HINDI DAPAT (Unang Tindig)

Laba'y di pa umiigting, katalo ko'y umamin na
Mga bakla anya'y mga alanganin na nilikha
Kundi ako namamali, sa akin lang sapantaha
Ang pagsuko po sa laban ay hangad nang ibandera.

Paalala ko din naman, nang ang tao ay likhain
Lalaki at babae lang, wala yaong alanganin
Karagdagang pagunita sa lahat ng mga bakling
Ako'y hindi nanlalait, matwid ang aking layunin.

Kung ako nga'y isinilang sa panahong sinauna
Yaong dapat na marating, walang dudang inabot na
Ngayong ako'y nakauwi, batbat na ng ekspiryensya
Sa dinako ko, si Raffy ay patungo pa lang pala.

Malinaw na di pa batid ni Rafael ang katwiran
Na ang bakla'y hindi ayon sa pulisya manilbihan
Palakarin yaong batas, patahimikin ang bayan
Na tapang ang itutumbas sa kaaway ng lipunan.

Ma-lalaki, ma-babae, sa pulisya'y sadyang bagay
Sa matagal nang panahon, sukat na ang katatagan
Subalit kung sasabihing bakla po ang isasalang
Naku, atse! Baka pati ang baril ay ipansuklay!
 

DAPAT (Ikalawang Tindig)

Ang hirap sa gumugurang na kagaya ni Gorgonying
Lalaki kung pumustura pero utak-alanganin
Babae at lalaki lang ang tao raw nang likhain
Pwes, ang bakla, kung di sa Dyos, ay kanino ba nanggaling?

Sya na rin po ang nagbuhol ng lubid na ibibigti
Nang amining sa gawaing pagpupulis, importante
Ay hindi ang kasarian kundi tapang, lakas, liksi
Katangiang taglay mandin ng iba sa mga syoke.

Ipatupad raw ang batas, payapain ang lipunan
Tapang anya'ng itatapat sa kaaway nitong bayan
Higit pa dyan, kayang gawin ng may gitnang kasarian
Na bukod sa matatapang ay super pang istariray.

Pag ang taong nag-aaplay ay qualified maging pulis
At dahil lang sa sya'y bakla kung kaya mo nire-reject
Labag yan sa konstitusyon, kung tawagin nga sa Ingles,
"Discrimination against persons on account of gender or sex!"
 

HINDI DAPAT (Ikalawang Tindig)

Tila baga nalimot na ni Tyu Paeng ang nagdaan
Na si Eba ay babae at lalaki po si Adan
Sa tanong nya kung saan daw nagmula ang kabaklaan
Ang sagot ay simpleng-simple, sa mali pong kinagisnan.

Kaylan man ay di paglabag sa batas o konstitusyon
Ang maghayag ng palagay at sarili nyang opinyon
Magpulis man po ang bakla, karapatan nila iyon
Danga't ito'y balagtasan, ang panig ko ay pagtutol.

Sinasabing ang bakla ay masahol pa sa babae
Mas mahina raw ang puso, at lamang din sa pag-arte
Higit makembot ang beywang, lalo't kaharap ay pogi
Kung macho ang huhulihin, ano na ang mangyayari?

Sa pagtugis sa kaaway, pagresponde sa tungkulin
Mayroon bang ibubuga silang Adan na mahinhin?
Kung sa ipis sila'y takot, sa bwaya pa na may pangil?
Ako po ay sadyang tutol na sila ay pagpulisin!
 

DAPAT (Ikatlong Tindig)

Meron palang kaeskwela si Pangulong Clinton dito
Makasagot lang ng tama, ang tanong ay binabago
'Kako, bakla'y saan galing? Tao silang kagaya mo
Ugali at katangiang kabaklaa'y ibang isyu!

Nilahat na ni Gonie po - basta bakla, awtomatik
Na hindi nya papayagang magtrabaho bilang pulis
Sobrang unfair - Bakit hindi daanin sa pagsusulit?
At kung sadyang di papasa, ipwera man ay may matwid.

Karapatan kahit ninong magbigay nga ng opinyon
Ngunit hindi lahat tayo'y hinirang na maging hukom
Kung wala pang paglilitis ay guilty na ang yong hatol
Baluktot ang hustisya mo, sa bakla ka'y mas masahol!
 

HINDI DAPAT (Ikatlong Tindig)

Kung Raffy'y abogado, nagtatanggol sa nasakdal
Pati lihis, igigiit sa sala po ng hukuman
Baka hindi niya batid, kapag ang judge ay naasar
Papatawan sya ng contempt, perjury ang kasalanan.

Ngunit di ko hinihiling sa amin pong Lakambini
Na gawaran sya'ng parusa sa paratang na hinabi
Kung hustisya ko'y baluktot, do'n sa bakla'y higit mali
Kahulugan sya'y balimbing, sa panig nya'y namumuhi.

Hindi dahil tutol akong silang bakla ay magparak
Ako na nga sa kanila'y asiwa at nababanas
Ayaw ko lang mahaluan silang tunay na kagawad
Ng mahina yaong loob at lalaking nakameyk-ap.
 

DAPAT

Sa likod ng kahinaan kadalasang nagkukubli
Ang lakas ng isang yagit na akala'y walang silbi
Baklang bongga kung magmeyk-ap, magdamit ay seksing-seksi
Pag pulis na ay mag-ingat ang rapist na makakati!

Kagalingan pa ng mga nagpupulis na double-switch
Mahirap na ispelengin ang kanilang puso't isip
Pwede silang mag-Hercules, o mag-ala-Osang Roces
Masisira ang diskarte ng kriminal kahit wais.
 

HINDI DAPAT

Pwede palang mag-Hercules o mag-ala-Roces Osang
Kaya bakla ay higit pang kailangan sa peryahan
Sa himpilan ng pulisya, di bagay ang kaartehan
Pagkat dito ay seryosong trabaho ang gagampanan.

Kung ang pulis ay palaban, gulat yaong masasama
Lalo't ito ay lalaki, sa porma ay bidang-bida
Subalit kung ito'y bakla, pulis-patola pong lampa
Lalaganap pa ang krimen sa halip na masawata.
 

DAPAT

Kung misyon mo'y undercover kaylangan kang magkunwari
At sa buy-bust operation pag-arte ang siyang susi
May lalaking pulis lamang sa tsapa at uniporme
Magagaling mangurakot, sa serbisyo'y walang silbi!
 

HINDI DAPAT

Kung baga sa pelikula, ibig yatang sabihin na
Ang kawawang baklang pulis, sa bwitre po ay patuka
Kung ang lalaki ngang pulis, mahilig sa dilihensya
Baklang pulis, sa pogi pong kawatan ay laglag-saya!
 

DAPAT

Ang alam ko, sa kapwa nya ay galit ang mandarambong
Bakla kaya ay gayon din? Ako lang po'y nagtatanong!
 

HINDI DAPAT

Sa isa bang naghahangad ng matatag na proteksyon
Sa bakla ba na pulis mo iaasa yaong tugon?
 

DAPAT

Eh, kanino? Sa lalaking police-holdaper-for-ransom?
 

HINDI DAPAT

Ang bulaklak bang katuray, mayrong bangong isisimoy?
 

DAPAT


Kahit bakla, di uurong!
 

HINDI DAPAT

Ngunit sila'y pusong mamon!
 

LAKANDIWA (Pagtatapos)

Kababayan, pasalamat muna't ating palakpakan
Si Gonie at si Rafael na magiting na naglaban
Kayo naman ang magsulit... alin nga ba'ng mas matimbang?
DAPAT ba o HINDI DAPAT ang bakla sa kapulisan?

 

Print

 



NAPANAHON  Si Manny Pacquiao at ang Politika  |  People Power vs. GMA?
KUNG KAMI ANG TATANUNGIN  Aral at Ligaw  |  Boksingerong Anak  |  Diborsyo sa Pilipinas  |  Hiling ng Magulang  |  Kapisan sa Bahay ang Biyenan  |  Matalino vs. Mayaman  |  Pag-asa ng Bayan  |  Paglahok sa Pulitika  |  Pagsasabi ng Totoo  |  Panghihimasok sa Buhay ng Iba  |  Pangingibang-Bansa  |  Pagsasawalang-Kibo ng Naaapi  |  Pusher na Kaibigan  |  Tahanan vs. Paaralan  
KAYO, BAYAN, ANG MAGPASYA!  Babae ang Manliligaw  |  Bakla sa PNP  |  Bata at Pamalo  |  Dagdag na taon sa Haiskul  |  Kapit sa Patalim  |  Katotohanan sa Pamamahayag  |  Maganda vs. Pangit  |  Mahal Mo vs. Mahal Ka  |  Pagkakaisa ng mga Pilipino  |  Pakialam sa Pag-ibig ng Anak  |  Pakikihalo ng Matanda sa SK  






Tunghayan din ang aking Blog

BlogTalasan ng Katwiran


PAKSA # 1
PGMA Hanggang 2010?
TANONG: Dapat ba o hindi dapat magpatuloy sa tungkulin bilang Pangulo ng Pilipinas si Ginang Gloria Macapagal-Arroyo hanggang sa taong 2010?

PAKSA #2
Executive Privilege vs People's Right To Know
TANONG: Sa kaso ni Neri na tumangging sagutin ang ilang katanungan sa pagdinig ng Senado hinggil sa kontrobersyang ZTE National Broadband Network Deal, alin ba ang nararapat bigyan ng higit na pagpapahalaga: Pribilehiyong Ehekutibo ng Pangulo? o Karapatan ng Mamamayan na Malaman ang Katotohanan?

PAKSA #3
Pag-ibig at Tampuhan
TANONG: Sa dalawang nag-iibigan, halimbawang kapwa sila nagkamali, sino ang unang dapat bumati at manuyo upang mawala ang alitan o tampuhan: Lalaki o Babae?

PAKSA #4
Paalam, Cory...Paalam, 'Democracy?'
TANONG: Sa muling pagkagising ng kamalayang makabayan sanhi ng pagpanaw ng dating Pangulong Corazon ‘Cory’ Aquino, ningas-kugon ba lamang ito – o patuloy na mag-aalab sa puso at diwa ng sambayanang Pilipino?

PAKSA #5
Noynoy for President?
TANONG: Dapat bang kumandidatong Presidente ng Pilipinas si Benigno "Noynoy" Aquino III sa halalan sa taong 2010?

PAKSA #6
Trahedya ni 'Ondoy'
TANONG: Malagim na trahedyang bunga ng bagyong 'Ondoy' at iba pang kalamidad sa Pilipinas na maaari namang iwasan kung may kaukulang paghahanda, sino ba ang may higit na kapabayaan – mamamayan o pamahalaan?

PAKSA #7
Epekto ng Print at Broadcast Media sa Pilipinas
TANONG: Higit bang nakatutulong o lalo lamang nakapipinsala ang print at broadcast media sa Pilipinas?



 


"Ang isang kasabihan sa bibig ng haling
ay tulad ng tinik sa kamay ng lasing."
                    – Kawikaan 26:9